Первомайский биҫтәһендә ихата фестивале үтте

Был көндө биҫтәлә йәшәүселәр өсөн бер нисә майҙансыҡта  бик матур, ҡыҙыҡлы  байрам әҙерләгәндәр ине. 19-сы мәктәп рәсем, сәйлән үреү, оригами, аппликациялар буйынса ижади оҫталыҡ дәрестәре уҙғарҙы. Пряниктарҙың биҙәлеше буйынса уҙғарылған оҫталыҡ дәресен иһә кескәйҙәр ҡыҙыҡһынып ҡараны. Үҙәкләштерелгән китапханалар системаһы филиалы  буккроссингта ҡатнашырға теләүселәргә үҙҙәренә оҡшаған китап алып, уның урынына икенсе китап килтерергә тәҡдим итте. “Ватан” хәрби-патриотик берләшмәһе традиция буйынса ҡоралдар күгәҙмәһен әҙерләгән. Спорт майҙансығында үткән  каратэ буйынса оҫталыҡ дәрестәре лә бик ҡыҙыҡлы булды.
Был көндө “Авангард” федераль ҡаҙна предприятиеһы уҙғарған спорт ярыштарында нормативты  үтәүселәр ҙур булмаған приздар алып һөйөндө. Теләге булғандарға  атта һыбай йәки арбаға ултырып йөрөргә лә була ине.

Фестиваль ҡунаҡтарын йәлеп иткән йәнә лә бер майҙансыҡ  – кинология хеҙмәте ойошторған дүрт аяҡлы дуҫтар менән күрһәтмә сығыштар. Теләгән кешегә эттәр менән фотоға ла төшөргә мөмкин булды.

Башҡорт мәҙәниәт колледжы студенттары  иһә биҫтә халҡына үҙҙәренең йыр-моңдарын бүләк итте.

Бына шундай  матур байрам әҙерләгән ҡала хакимиәтенең йәштәр сәйәсәте бүлеге. Ихата фестивале биҫтәлә йәшәүселәрҙең күңеленә хуш килде.

Р.ЗАМАНОВА.

Фотолар ҡала хакимиәте сайтнынан алынды.

 Фекер

 Илһам Абдуллин, ҡала хакимиәтенең алыҫ биҫтәләр менән эшләү буйынса сектор начальнигы:

- Башҡортостан Башлығы Радий Хәбиров Стәрлетамаҡты төҙөкләндереүгә ҙур иғтибар бирә. Ҡала эсендәге юлдар, йорт яны ихаталары төҙөкләндерелә, туҡталыштарға яңы павильондар ҡуйыла. Шулай уҡ йорт алды ихаталарында төрлө саралар уҙғарыла. Мәҫәлән, ошо көндәрҙә Первомайский  биҫтәһендә уҙғарылалған ихата байрамы ошо хаҡта һөйләй. Яйлап ҡына ҡаланың алыҫ биҫтәләре лә төҙөкләндерелә, социаль объекттар ҡалҡып сыға. 19-сы мәктәпкә бынамын тигән ремонт яһалды, мәғариф учреждениеһы заманса ҡорамалдар менән йыһазландырылды. Әлеге ваҡытта Ашҡаҙар аръяғы биҫтәһендәге 16-сы мәктәптә һәм балалар баҡсаһында ремонт эштәре  бара. Шахтау ҡасабаһындағы 9-сы мәктәп  нур бөркөп үҙенә саҡырып тора, бына шундай матур, өр-яңы мәктәптә уҡыуы ла күңелле, әлбиттә. Шулай уҡ, алыҫ биҫтәләге мәктәптәрҙең тағы береһен ремонтлау күҙ уңында тотола.