Йырлап-гөрләп асылды XXXIV театр миҙгеле!

Театрыбыҙҙың береһенән-береһе оҫта артистары был юлы ла яратҡан тамашасыһын ғәжәп итте. Был кисте спектакль башланыр алдынан икенсе ҡаттағы фойела йыр-бейеүле тамаша тантана итте. Яңы ижад миҙгелен һағынып көтөп алған тамашасыларыбыҙ артистарыбыҙ менән бергәләп байрам итте –  яратҡан актерыбыҙ Марат Зөбәйеровтың дәртле гармун моңона ҡушылып бейергә төшөп китте. Был кистә,  шулай уҡ. теләгән кешегә яңы фотозонала иҫтәлеккә фотоға төшөргә мөмкин ине, ҡул эштәре күргәҙмәһе лә эшләне.

Театрҙың тотош коллективы тиерлек ҡатнашҡан спектаклдә  һәр кем үҙ ролен тел тейгеһеҙ итеп уйнаны. Тетрәндергес, шул уҡ ваҡытта тормошсан, яңы һулыш менән һуғарылған спектаклдән әҫәрләнгән тамашасы артистарҙы дәррәү алҡыштарға күмде.

Төп ролдәрҙе уйнаған халыҡ артистары Физәлиә һәм Илһам Рәхимовтар, Илгиз Әкимбәтов, Фәнил Ҡарасурин, Гөлйемеш Ибраһимова, Әлиә Зарипова (бәләкәй ҡыҙ ролен Мәликә Зарипова уйнаны), Рәсил Сынбулатов, Илнур Атъетәров, Илнур Сәлимгәрәев – һәр ҡайһыһы үҙенә тәғәйен образын ҡойоп ҡуйҙы! Ҡуйыусы режиссер еңел булмаған яҙмышлы кеше яҙмышын хикәйәләүсе әҫәрҙе ҙур оҫталыҡ менән  ҡыҙыҡлы итеп асып биргән. Шуныһы үкенесле, Олег Закир улы  был юлы үҙе килә алмаған.

Сәхнә биҙәлеше, музыкаль яҡтан биҙәлеш –  барыһы бер бөтөнгә әйләнеп, бына шундай ғәҙәти булмаған форматтағы, юғары профессиональ кимәлдәге сәхнә әҫәре барлыҡҡа килгән.

Спектаклде ҡарағандан һуң БР мәҙәниәт министры (профессиональ сәнғәт буйынса) урынбаҫары Ринат Ғайсин, ҡала мәҙәниәт бүлеге начальнигы вазифаһын башҡарыусы Раушания Күсмәева, Стәрлетамаҡ театр-концерт берләшмәһе директоры Харис Әбдрәхимов залдағыларҙы яңы ижад миҙгеле асылыу менән ҡотланы, БР-ҙың халыҡ артисы Зөлфиә Хәлиловаға, күркәм юбилейы айҡанлы, күп йыллыҡ намыҫлы хеҙмәте өсөн Стәрлетамаҡ ҡала хакимиәте башлығының Маҡтау грамотаһын тапшырҙы.

Шөкөр, юғары профессиональ кимәле менән ғорурланырҙай  олпат театры бар Стәрлетамаҡтың! Әйткәндәй, театр коллективы яҡын арала гастролдәр менән Дағстандың Дербент ҡалаһына йыйына. Йырлы, нурлы театрыбыҙ артабан да шулай гөрләтеп эшләһен, күңелдәргә шатлыҡ, сафлыҡ өҫтәп, барлыҡ ҡайғыларҙы таратһын әйҙә!

Роза ҠОБАҒОШОВА.

Фотолар Стәрлетамаҡ театр-концерт беләшмәһе сайтынан алынды.