ХӘҮЕФҺЕҘЛЕК ЛАБОРАТОРИЯҺЫ ЭШ БАШЛАНЫ

Бында бөгөн  “ЧиП” хәүефһеҙлек лабораторияһы” проекты старт алды.

Был проект “Башҡорт сода компанияһы” акционерҙар йәмғиәте башланғысындағы “Стәрлетамаҡ – уртаҡ йортобоҙ” грант конкурсында еңеүсе булып тора. Гранттың күләме 1 миллион һум самаһы тәшкил иткән.

Сараны асыуҙа Стәрлетамаҡ ҡала хакимиәте башлығының беренсе урынбаҫары Артур Ғафаров, ҡала хакимиәте эштәре менән идара итеүсе Зәлиә Баринова, Башҡорт сода компанияһының  йәмәғәтселек менән бәйләнеш буйынса директоры Сергей Лобастов, ҡаланың эске хеҙмәт капитаны Алексей Евстигнеев, юл хәрәкәте хәүефһеҙлеген пропагандалау буйынса инспектор Роман Сәйфетдинов һәм башҡа саҡырылған вәкилдәр бар ине.
“ЧиП” лабораторияһы – ул ҡала мөхитендә  балаларҙың һәм үҫмерҙәрҙең хәүефһеҙ тәртип культураһын тәрбиәләү буйынса интерактив мәғрифәтселек майҙансығы. Ул юлдарҙа, урамда һәм көнкүрештә, ял иткәндә хәүефһеҙ тәртип ҡағиҙәләрен күрһәтеүсе экспонаттар һәм макеттар менән йыһазландырылған.

Балалар өсөн сағыу был майҙансыҡта төрлө хеҙмәттәр менән миниатюрала мини-ҡаласыҡ ойошторолған. Бында “Автоҡаласыҡ”, “Парковкалау”, “Янғын һүндереү”, “Ашығыс ярҙам” һымаҡ  станциялар бар. Унда  янғын хәүефһеҙлегенә, юл хәүефһеҙлеге ҡағиҙәләренә, беренсе медицина ярҙамы күрһәтеүгә арналған һәм башҡа бер нисә локация ойошторолған. Балалар  ҡалала, шул иҫәптән юлдарҙа үҙеңде нисек тоторға, ҡала объекттарына һаҡсыл ҡараш һәм башҡа күп нәмәләр тураһында уйын формаһында  ябай ғына итеп профилактик мәғлүмәт ала аласаҡ.

Лабораторияла шулай уҡ интерактив экскурсиялар, квестар, лекциялар, тормоштоң төрлө өлкәләрендә ҡала халҡы хәүефһеҙлеген тәьмин итеүсе һөнәр эйәләре менән осрашыуҙар уҙғарыласаҡ. Шулай уҡ  мәктәп уҡыусыларын да саҡырып,  Ғәҙәттән тыш хәлдәр, Дәүләт автоинспекцияһы хеҙмәткәрҙәре менән осрашыуҙар уҙғарырға уйлайҙар.

 “Грант аҡсаһына проект тематикаһы менән бәйле интерактив һәм уйын ҡорамалдары, телевизорҙар, китаптар һатып алынды. Был залда урындағы бюджет аҡсаһына бик яҡшы ремонт эшләнде. Китапхананы хәҙер танырлыҡ та түгел, - тип һөйләне Үҙәкләштерелгән китапханалар системаһы директоры Елена Калюжная. 

Проект балаларҙың хәүефһеҙлек проблемаһын ғына хәл итеп ҡалмай, ә иһә йәйге айҙарҙа ғаилә менән бергәләп Стәрле яр буйына сығып, саф һауала ошондай интеллектуаль саралар уҙғарырға ла мөмкин буласаҡ, ти ойоштороусылар.

Р.САФИНА.

Фотолар китапхана сайтнынан һәм социаль селтәрҙәрҙән алынды.