Стәрлетамаҡ егете – “Йыл меценаты”!

 “Юлдаш”  радиоһы йыл һайын Гагарин паркында уҙғарылып килгән “Беҙ бергә” фестивале партнерҙары булып сығыш яһай һәм был тамаша күптән инде халыҡтың иң яратҡан күңел байрамдарының береһенә әйләнде.

Оҙаҡ йылдар дауамында башҡорт халҡының милли мәҙәниәтен, телен һәм рухи ҡиммәттәрен  һаҡлау, үҫтереү, башҡа милләттәр менән теләктәшлеген нығытыу буйынса әүҙем, емешле эшләгәне өсөн “Галактика” күңел асыу үҙәге селтәре  директоры Рафаэль Мифтахов “Йыл меценаты” номинацияһында еңеүсе булды. Алһыҙ-ялһыҙ эшләгән етәксенең күп йыллыҡ хеҙмәте халҡыбыҙҙың юғары наградаһы – “Ал да нур сәс халҡыңа!” миҙалы менән баһаланды. Награданы Рәсәй Федерацияһының дәүләт Думаһы депутаты, Бөтә донъя башҡорттары ҡоролтайы президиумы рәйесе Эльвира Айытҡолова тапшырҙы.

“Ал да нур сәс халҡыңа!” – Бөтә донъя башҡорт ҡоролтайының иң юғары наградаһы башҡорт халҡының милли мәҙәниәтен, телен һәм рухи ҡиммәттәрен  һаҡлау, үҫтереү, башҡа милләттәр менән теләктәшлеген нығытыу буйынса әүҙем, емешле эшләгән күренекле мәҙәниәт, әҙәбиәт әһелдәренә, башҡорт халҡының рухи хазинаһын һаҡлаусы шәхестәргә 2010 йылдан бирле тапшырылып килә. Ҡалабыҙҙы  шундай күркәм шәхестәребеҙ биҙәүе менән сикһеҙ ғорурланабыҙ, Рафаэль Камил  улына һәм уның берҙәм, тырыш “Галактика” күңел асыу үҙәге коллективына яңынан-яңы уңыштар теләйбеҙ! Бергә булдыҡ, артабан да бергә булайыҡ!

Р.ЗАМАНОВА.

Фотолар “Галактика” күңел асыу үҙәге селтәре сайтынан алынды.