Бөрйәндә «Әхмәт әйтеше» сәсәндәр конкурсы уҙҙы

Сәсәндәр бәйгеһендә Әхмәт Сөләймәновтың улы — Башҡортостан Республикаһының атҡаҙанған рәссамы Йәлил Сөләймәнов та ҡатнашты. Конкурста райондың төрлө ауылдарынан 38 сәсән ҡатнашып, һәр сығыш яһаусы тәүҙә эпос менән ҡобайыр һөйләһә, аҙаҡ улар «Әхмәт әйтешендә» һүҙ тапҡырлығында ярышты.

Шулай итеп, эпос һөйләүселәр араһында Исламбай ауылынан Маһира Хәйбуллина 1-се урын яулаһа, Ҡолғана ауылынан Рәйфә Шәйхисламова менән Кейекбайҙан Ғәбиҙә Туҡбаева икенсе, Килдеғолдан Дилфүзә Билалова һәм Исламбайҙан Флүзә Әхмәтйәнова өсөнсө урындарға сыҡты. Ҡобайыр һөйләүселәр араһында Яңы Собханғол ауылы вәкиле Миңзәлә Баймырҙина алдынғылыҡты бирмәне. Яңы Собханғол ауылынан Алһыу Әхмәтова һәм Яуымбайҙан Зилә Хәйбуллина икенсе, Байназар батыры Сәғит Алтынбаев менән Аҫҡар һылыуы Зөлфирә Айытбаева өсөнсө баҫҡыста нығынды. Шулай уҡ төрлө номинациялар ҙа булдырылғайны: «Бөрйән ерлегендә тыуған эпосты башҡарыусылар» тип Яңы Монасип ауылынан Рәис Ҡыуандыҡов һәм Гүзәл Баймырҙина танылды; «Үҙенсәлекле башҡарыусы» исеменә Иҫке Мөсәттән Филиә Күҫәпова лайыҡ булды; «Өмөт» номинацияһында Ғәҙелгәрәй ауылынан Нәзифә Билалова, «Моңло сәсән» номинацияһында Әбделмәмбәт Гөлүзә Шәмиғолова бүләкләнде. Бер нисә кешегә Республика халыҡ ижады үҙәгенең рәхмәт хаттары һәм махсус бүләктәре тапшырылды. Конкурстың төп бәйгеһе — «Әхмәт әйтешендә» урындар түбәндәгесә билдәләнде: 1-се урында Рәүилә Баймырҙина, Тимер ауылы; 2-се урында Нәсимә Сәғитова, Яңы Монасип ауылы һәм Ғәлимә Әминева, Ғәлиәкбәр ауылы; 3-сө урында Әлфиә Сәғитова, Ғәҙелгәрәй ауылы, Земфира Мәжитова, Яңы Усман ауылы. Төп бүләк — Гран-при Яңы Усман ауылынан Шәфҡәт Мәзитовҡа тапшырылды. Уға Йәлил Әхмәт улы Сөләймәнов үҙенең кртинаһын бүләк итте.

«Әхмәт әйтеше» район сәсәндәр конкурсы бик күп яңы таланттар асты. Башҡорт теленең бай һәм үҙенсәлекле икәнен конкурста ҡатнашыусыларыбыҙ тағы берҙе иҫбатланылар. Халҡыбыҙҙың ауыҙ-тел ижадын үҫтереүҙә һәм киләсәк быуынға тапшырыуҙа сәсәндәргә уңыштар теләйбеҙ.


https://kurultai.ru/ba/content/2061-rajonnyj-konkurs-skazitelej-hmt-jteshe/?tag%5B1%5D=news