Сәләмәт булыу модала!

8 февраль Фән көнө генә түгел, ә шулай уҡ спорт көнө лә. Шәмбе көн үткән “Рәсәй саңғы юлы - 2025” сараһында 1300ҙән ашыу Стәрлетамаҡ халҡы ҡатнашты. Улар араһында - студенттар, мәктәп уҡыусылары, предприятиелар һәм учреждениелар коллективтары. Ҡатнашыусылар күтәренке кәйефтә, дәртле итеп 600 метрҙан 3 км араны еңел генә үтте, ә һуңынан ҡайнар сәйҙән ауыҙ итеп, йылына алды.

“Ағымдағы йылда “Рәсәй саңғы юлы” Ватан һаҡсыһы йылына һәм Махсус хәрби операцияла ҡатнашыусыларға һәм уларҙың ғаилә ағзаларына ярҙам итеү йылына бағышланды. Бөгөнгө сара ҡатнашыусыларҙың барыһына ла айырыуса яуаплылыҡ өҫтәгәндер, тип уйлайым”, - тине ҡала хакимиәте башлығы Э.Шәймәрҙәнов йүгереш аҙағында.

Барса ҡала халҡы ҡатнашлығында бындай күмәк ярыштарҙың мәғәнәһе, әлбиттә, ҙур еңеүҙәрҙә түгел, ә ҡала кимәлендә командалар булдырыуҙа, берләшеүҙә һәм күтәренке кәйеф булдырыуҙа.

Фото Э.Шәймәрҙәновтың сәхифәһенән.