“ТЫУҒАН ЕРЕГЕҘҘЕҢ ПАТРИОТТАРЫ БУЛЫҒЫҘ”

Паспорт алыу – йәш граждандар өсөн оло тормош һәм үҙаллылыҡ башланыуын билдәләй, сөнки паспорт һәр ил гражданының шәхесен асыҡлаусы хоҡуҡи документ булып тора. Был ысынлап та әһәмиәтле ваҡиға.

Үткән аҙнала Республика көнө айҡанлы, ҡала хакимиәтендә ҡала хакимиәте башлығы вазифаһын башҡарыусы Эмиль Шәймәрҙәнов менән полиция полковнигы Руслан Афрутьев уҡыуҙа, фәндә, спортта, ижадта һәм ижтимағи эшмәкәрлектә уңыштарға өлгәшкән 48 мәктәп уҡыусыһына тантаналы рәүештә паспорт тапшырҙы. Сарала Стәрлетамаҡтың йәш граждандары һәм ата-әсәләр ҡатнашты.

Үҙенең сәләмләү телмәрендә Эмиль Владиславович:

– Хөрмәтле йәштәр! Бөгөнгө көн һеҙҙең тормошоғоҙҙа иң әһәмиәтле көндәрҙең береһе. Иҫегеҙҙә тотоғоҙ: бынан ары һеҙгә ҙур һәм мөһим хоҡуҡтар ғына түгел, ә үҙегеҙҙең эштәрегеҙ өсөн яуаплылыҡ та йөкмәтеләсәк. Тыуған илебеҙҙең лайыҡлы граждандары булыуығыҙҙы теләйем, сөнки һеҙ – беҙҙең киләсәгебеҙ. Буласаҡ ил менән һеҙ идара итәсәкһегеҙ, уның ниндәй булыуы тик һеҙҙән торасаҡ. Һеҙгә уңыштар, үҫешегеҙ өсөн дөрөҫ юл һайлауығыҙҙы һәм маҡсатығыҙға табан барыуығыҙҙы теләйем! – тигән теләктәр еткерҙе.

Йомғаҡлау телмәре менән Руслан Александрович сығыш яһаны:

– Һеҙ бөгөн паспорт алдығыҙ. Ул һеҙҙең төп документығыҙ булып һанала. Шуның өсөн уның менән һаҡсыл ҡулланығыҙ. Шулай уҡ йәшәгән илегеҙҙең тарихын хөрмәт итегеҙ һәм яратығыҙ. Тыуған ерегеҙҙең патриоттары булығыҙ. Барығыҙҙы ла Республика көнө менән ҡотлайым һәм һеҙгә тик изге теләктәр герә теләйем, – тине ул.

Матур теләктәргә өҫтәп, был уҡыусылар артабан да һынатмаҫ, ҡалабыҙҙың ғорурлығы булыр тип өмөттәр бағлайыҡ!

Гүзәл РӘМИЕВА

Автор фотолары