+24 °С
Облачно
Яңылыҡтар
17 Августа 2018, 11:08
Үләнгә ятып әкиәттәр уҡыныҡ
Йәй осоронда китап уҡырға ваҡыт юҡ һымаҡ. Әммә ниндәйҙер шәп әҫәргә юлығыуың була, эҫе ҡояш, һыу буйы онотола ла ҡуя. Бигерәк тә юлыңда осраған китапханасылар ул әҫәрҙе үҙҙәре тәҡдим итһә...
Ҡаланың Абдулҡадир Инан исе-мендәге башҡорт-татар әҙәбиәте үҙәге хеҙмәткәрҙәре асыҡ һауала “Китаплы йәй” исемле акция үткәрҙе.
– Урамдан килгән ҡала халҡын һикһәндән ашыу китап менән ҡаршы алдыҡ, туҡтап, уҡығандар, беҙҙең менән аралашып торғандар байтаҡ булды, – тип һөйләне был сара хаҡында китапхана мөдире Нәзифә Иҫәнғужина.
Каникул осоронда балалар уҡыу әспабтарынан ял итһә, бына нәфис әҙәбиәт менән ихласлап танышты. Кемдер китаптарҙы ҡараштырып ҡына сыҡһа, ҡайһы бер малай-ҡыҙҙар үләнгә ултырып, хатта ятып әкиәттәр уҡыны, ә хәреф танымағандар китапханасы апайҙарының уҡығанын тыңланы. Ғөмүмән, мө-хәббәт романдары, де-тектив китаптары, фан-тастика... бер жанр ҙа иғтибарһыҙ ҡалманы.
Әлбиттә, был сара китап уҡыу менән генә сикләнмәне, китапхана хеҙмәткәрҙәре нисек әҫәр һайларға, электрон китап яҙҙырырға һымаҡ мәсьәләләргә лә туҡ-талды. Әйткәндәй, әлегеләй йәнле аралашыу ҡаланың башҡа китап-ханаларында ла үткәрелә бара. Ҡыҫҡаһы, әҫәр менән уҡыусы хәҙер китапханала ғына осрашмай.
