+30 °С
Болотло
Яңылыҡтар
31 Декабрь 2020, 21:00
Беҙҙән дә артистар сығыр әле
Тыуған ҡалабыҙ Стәрлетамаҡтағы Башҡорт дәүләт драма театрында бер-бер артлы спектаклдәр булып тора, тик быға тиклем тамашалар күберәк өлкәндәр өсөн ине. Ә бына яратҡан яҙыусыбыҙ Мостай Кәримдең “Өс таған” повесы буйынса спектакль ҡуйылыу беҙҙең өсөн дә шатлыҡ булды. Әҫәрҙәге малайҙарҙың күлдән балыҡ тотоп, бейек тау башына күлгә ебәрергә тырышыуҙары, шул арҡала төрлө мажараларға тарыуҙары тураһында беҙ 5-се класта уҡығайныҡ. Ә хәҙер ошоларҙы артистар башҡарыуында залдан күҙәттек, сөнки класс етәксебеҙ Светлана Тимерғәлиева беҙҙе спектакль ҡарарға алып барҙы.
Унда төп ролдәрҙе башҡарған артист ағайҙар менән бергә беҙҙең гимназия малайҙары Ғималов Илһам, Тимерғәлиев Илдар, Дәүләтбаев Ислам, 21-се мәктәп уҡыусылары Нагаев Арыҫлан менән Аэлина ла уйнаны. Уларҙың уйнауын ҡарау бигерәк тә ҡыҙыҡлы булды.
Стәрлетамаҡ Башҡорт драма театры менән беҙҙең гимназия менән бик дуҫ, ундағы актерҙар беҙҙә йыш сығыш яһай. Декабрь айында гимназия сәхнәһендә ойошторолған лекторийҙа Илһам ағай Рәхимовтың Мостай Кәримдең “Оҙон-оҙаҡ бала саҡ” әҫәрен йотлоғоп уҡығанын тыңлағайныҡ. Артем Болотов етәкселегендәге Рус милли музыка ҡоралдары оркестры башҡарған көйҙәр әҫәрҙең йөкмәткеһен тағы ла тәрәнерәк үҙләштерергә ярҙам итте.
Киләсәктә лә беҙ театр сәнғәтенең дуҫтары булып ҡалырбыҙ, тип ышанам. Ә, бәлки, арабыҙҙан артистар ҙа сығыр!
Гөлназ Ғирфанова.
6Б класы уҡыусыһы.
