+30 °С
Болотло
Яңылыҡтар
31 Декабрь 2020, 21:00
Килде бит!
“Ур-р-р-а” тип ҡыуанып ҡуйғандыр һәр кем кисә – ниһайәт, көтөп алған ҡыш килде! Килешәһегеҙме, күктән ҡар бөртөктәре төшә башлау менән күңел күтәрелеп китте. Ҡыҙыҡ, ғәҙәттә яҙҙы һәм йәйҙе көтөп ала алмай бер булабыҙ, ә бында һыуыҡ миҙгелде һағын, имеш. Хәйер, декабрь етеү менән генә ҡыш килергә тейеш тимәгән. Артабан һүҙебеҙ ҡыштың ошо һәм башҡа үҙенсәлектәре хаҡында.
Ерҙең төньяҡ ярымшарында ул 22 декабрҙә башлана һәм 21 мартта тамамлана, көньяҡ ярымшарҙа иһә 22 июн-дән 21 сентябргә ҡәҙәр дауам итә икән – һүҙ астрономик ҡыш хаҡында бара.
Климатты өйрәнеүселәр фекеренсә, был миҙгел тәүлектең уртаса температураһы 0-дән түбән төшкән ваҡытта башлана. Температура тигәндән, иң һыуыҡ урын һәм көн буйынса рекорд ҡуйылған – Антарктидала 2013 йылдың 8 декабрендә - 91,2 градус булған.
Ҡыш тигәс тә беҙ, климатыбыҙға ярашлы, уны һыуыҡ төшөү аша күҙ алдына килтерәбеҙ, ә ҡайһы бер ерҙә ҡар менән бәрешеп уйнай алмайҙар, рәхәтләнеп бит алмалары ҡып-ҡыҙыл булғансы өшөргә лә мөмкинселек юҡ. Ә ҡайһы саҡ йәй уртаһында ла күңел ҡышты талап итә башлай. Мәҫәлән, Францияла Людовик XIV-нең ҡатынының бер мәл сана шыуғыһы килеп китә – тышта йәй. Хәләл ефетен өҙөлөп һөйгән батша ҡолдарына тоҙ һәм шәкәрҙән “ҡар өйөмө” яһараға ҡуша… Бына шулай, кем ҡышты ярата, кем – ҡатынын. Тик берәүҙәр ҡышты үҙ итһә, икенселәр унан үлемдән ҡурҡҡан һымаҡ ҡурҡа. Туңып үлеүҙән шөрләй икән ундай ауырыуҙар. Ә бына әлеге сирлеләр Иркутск өлкәһенә барыр инеме икән, сөнки нәҡ унда ҡыш миҙгеле исемен йөрөткән ҡала бар. Нисек кенә булмаһын, беҙгә “Зима”ға барырға кәрәкмәй, ҡыш үҙе килә. Ана, нисек ерҙе ап-аҡ хозурлыҡ ҡаплап алды…
