СТӘРЛЕТАМАҠТАР ӘҮҘЕМЛЕК КҮРҺӘТТЕ

– Иртән үк һайлап, бер юлы магазинға инеп, бөтә эштәремде тамамлап ҡуйырға күнеккәнмен, –ти Валентина Ивановна.

– Һайлауҙарға мотлаҡ барырға кәрәк, ил киләсәге кандидаттар өсөн генә түгел, беҙҙең өсөн дә мөһим, кәрәкле. Шуға һәр кем тауыш бирергә бурыслы, – тип һүҙгә ҡушылды Марат Йәғәфәр улы.

Был көндө ҡалала 120 һайлау участкаһы эшләне, шуның 6-һы - ябыҡ типтағы (дауахана һәм тәфтиш изоляторҙары). Тауыш биреүселәр - 202 270 кеше. Һәр участкаға уртаса 5-6 күҙәтеүсе беркетелгән. Әйткәндәй, стәрлетамаҡтар буласаҡ Рәсәй Президенты кандидаттары өсөн тауыш биреү менән бер рәттән «Заманса ҡала мөхите» проекты буйынса ла тауыш бирҙе. Йәмғеһе 5 биләмә тәҡдим ителгән. Ҡайһы биләмә проект сиктәрендә ремонтланасаҡ – быны тауыш биреп, ҡала халҡы хәл итә.

Шуныһы иғтибарға лайыҡ: һайлау көнөндә стәрлетамаҡтар троллей-бустарҙа бушлай йөрөнө.

* * *

Рәсәй Президентын һайлау йәмғиәттең берҙәм булыуын һәм ғәмәлдәге дәүләт башлығы курсын яҡлауҙы күрһәтте, тип белдерҙе Башҡортостан Башлығы Рөстәм Хәмитов, үткән һайлауға йомғаҡ яһап.

– Ғәмәлдәге президент Владимир Владимирович Путин бер һүҙһеҙ еңеп сыҡты. Һөҙөмтәләр бик юғары, республикабыҙҙа – 77,7 процент. Башҡортостанда ҡалалар ҙа, ауыл халҡы ла Владимир Владимировичты, уның сәйәсәтен, уның һуңғы алты йыл дауамындағы эшен әүҙем яҡланы, – тине Рөстәм Хәмитов.

Илдә халыҡтың 67 проценттан ашыуы һайлауҙа ҡатнашҡан, был – бөтә властың, йәмәғәтселектең, сәйәси партияларҙың ҙур эш һөҙөмтәһе.

Һайлаусылар түбәндәгесә

тауыш биргән:

Бабурин С.Н. — 0,69%

Грудинин П.Н — 12,09%

Жириновский В.В. — 5,03%

Путин В.В. — 77,69%

Собчак К.А. — 1,26%

Сурайкин М.А. — 0,89%

Титов Б.Ю. — 0,69%

Явлинский Г.А. — 0,84%.

Һайлау көнөндә участкаларҙа 11 993 күҙәтеүсе, 104 мең мәғлүмәт сараһынан 250 журналист булған.

Һайлау кампанияһы башланғандан алып 80 мөрәжәғәт килгән. Яҡынса мәғлүмәттәр буйынса, был мөрәжәғәттәрҙә һайлау ҡануниәтен боҙоу теркәлмәгән.