+24 °С
Облачно
Яңылыҡтар
31 Декабря 2020, 21:00
Учалынан «оркестр» ҡыҙ – Ләйсән!
Башҡортостандан данлыҡлы «оркестр» ҡыҙыҡай Мәскәүҙә «Зәңгәр ҡош» бөтә Рәсәй конкурсында сығыш яһаны. Учалы районының Яңы Байрамғол ауылынан Ләйсән Золотарёва жюриҙе үҙенең ғәҙәти булмаған тауышы һәм бер юлы бер нисә музыка ҡоралында уйнау һәләте менән арбаны. Уның ҡатнашлығында тапшырыуҙы 19 ноябрҙә киске сәғәт 6-ла «Россия-1» каналында ҡарай алаһығыҙ.
Әйткәндәй, көҙөн Ләйсән Золотарёва «Таланттар ере» бөтә Рәсәй конкурсында еңде. «Башҡортостан» дәүләт телерадиокомпанияһының «Ал сәскә» телевизион конкурсы йәш башҡарыусыға ҙур билдәлелек килтерҙе, унда ул жюриҙең махсус бүләгенә лайыҡ булды.
Ләйсән үҙен сәхнәлә бик профессиональ тота, ҡурай, ҡумыҙ, думбыра кеүек музыка ҡоралдарында уйнай. Туғыҙ йәшендә ул бай йөкмәткеле ижади биографияға эйә. Алты йәшендә ул «Учалы йондоҙҙары» фестивалендә беренсе урын яулай. Быйыл Дүртөйлө ҡалаһында уҙған «Яҙғы тамсы» республика йыр конкурсы финалында шулай уҡ беренсе урын ала. «Рәсәйҙең һәләтле балалары» бөтә Рәсәй конкурсында бейеү менән икенсе урынға лайыҡ була. Ләйсән Золотарёва – республика Башлығы стипендиаты, күп тапҡыр «Урал батыр» эпосы сәсәндәре конкурсы еңеүсеһе.
