Радий Хәбиров яғыулыҡ ҡойоу станцияларының тотороҡло эшен тәьмин итергә ҡушты

Башҡортостандың нефть эшкәртеү заводтары яғыулыҡ етештереү күләмен арттырҙы, тип һыҙыҡ өҫтөнә алды төбәк етәксеһе.

– Макроиҡтисади факторҙар, субъектив характерҙағы сәбәптәр булыуы аңлашыла. Беҙҙең предприятиелар ярайһы уҡ интенсив режимда эшләй. Шул уҡ ваҡытта логистика менән бәйле һорауҙар бар, – тине Радий Хәбиров. – Яғыулыҡ ҡойоу станциялары структураһы төрлө. Ҡайһы бер райондарҙа шәхси станциялар ғына бар. Уларҙың бәләкәйлеге һәм бензин һатып алыу мөмкинлектәре булмау сәбәпле, халыҡ яғыулыҡһыҙ ҡала. Барыһын да кешеләргә һәм шау-шыу тыуҙырған ихтыяжға япһарырға кәрәкмәй. Беҙ бензинды канистрҙарға ебәрмәҫкә тигән ваҡытлыса ҡарар ҡабул иттек. Шуға күрә мөһим бурыс – нормаль логистиканы ойоштороу.

Башҡортостан Хөкүмәте Премьер-министры Андрей Назаров хәбәр итеүенсә, республика булышлығында «Башнефть» компанияһы менән муниципалитеттарҙа ваҡлап һатыусылар араһында яғыулыҡ һатып алыу тураһында килешеүҙәр төҙөлгән.

Вице-премьер – төбәктең сәнәғәт, энергетика һәм инновациялар министры Александр Шельдяев хәбәр итеүенсә, автозаправкалау станцияларын яғыулыҡ менән тотороҡло тәьмин итеү өсөн оператив штаб булдырылған. Нефть продукттары етештереү арттырылған планға ярашлы бара. Ә бензин заправкаларының эшен күҙәтеү сираттарҙың кәмеүен күрһәтә.

Радий Хәбиров Башҡортостан Башлығы Хакимиәтенең Контроль идаралығына ҙур булмаған шәхси яғыулыҡ ҡойоу станцияларында һатылған яғыулыҡтың хаҡын анализларға ҡушты.

– Хаҡтарҙы ҡайҙа арттырыуҙарын ҡарарға кәрәк. Автозаправкалары булған бер нисә компания юл буйы сервисына дәүләт ярҙамы саралары ярҙамында үҫешә һәм улайтырға тейеш түгелдәр, – тип билдәләне төбәк етәксеһе.

https://glavarb.ru/ba/news/event/radiy-hbirov-bashortostan-hkmten-tbkte-yayuly-oyou-stanciyalaryny-totorolo-eshen-tmin-iterg-ushty/