Башҡортостанда 2026 йылдан балалы ғаиләләргә ярҙам буйынса яңы саралар ғәмәлдә

Пенсия һәм социаль страховкалау фондының республика бүлексәһе идарасыһы Фәнил Вәхитов хәбәр итеүенсә, төбәктә 264 мең балаға 130 меңдән ашыу ата-әсә бала тыуыу һәм тәрбиәләү менән бәйле берҙәм пособие ала.

Яңы ярҙам саралары иҫәбендә – 18 йәшкә тиклемге йәки көндөҙгө бүлектә уҡыған 23 йәшкә тиклемге ике йәки унан күберәк бала тәрбиәләгән эшләүсе ата-әсәләр өсөн ғаилә түләүҙәре. Ул түбән килемле ғаиләләргә йыл һайын уҙған йыл өсөн түләнгән физик шәхестәрҙең килеменә һалымдың бер өлөшөн ҡапларға мөмкинлек бирәсәк. Түләү ике ата-әсәгә лә билдәләнә ала. Мөһим шарт – алимент буйынса бурыстар, ата-әсә хоҡуғынан мәхрүм ителеү йәки сикләү булырға тейеш түгел. Ғаилә түләүенә ғаризаны йыл һайын 1 июндән 1 октябргә тиклем тапшырырға мөмкин. Республикала 40 меңдән ашыу кеше үҙ хоҡуҡтары менән файҙаланған да инде.

– Түләүгә 2025 йыл өсөн уртаса килеме – һәр ғаилә ағзаһына йәшәү минимумының бер ярым тапҡырынан, йәғни 23 673 һумдан, ә мөлкәте билдәләнгән нормативтан артмаған ғаиләләр дәғүә итә ала, – тип өҫтәне Фәнил Вәхитов.

Был өлкәләге яңылыҡтар иҫәбендә шулай уҡ – күп балалы ғаиләләргә бала тыуыу һәм тәрбиәләү менән бәйле айлыҡ пособие тәғәйенләү шарттарын яҡшыртыу.

– 2026 йылдан федераль законға ярашлы килеме йәшәү минимумынан 10 проценттан артмаған ғаиләләргә түләү рөхсәт ителде, – тине Фәнил Вәхитов. – Быға тиклем түләү билдәләнмәгән осраҡтар буйынса ҡарарҙарҙы яңынан ҡараныҡ.

Ярҙам саралары ведомство-ара алмашыу сиктәрендә ҡабул ителгән мәғлүмәттәр нигеҙендә Берҙәм үҙәкләштерелгән һанлы платформала билдәләнә.

Башҡортостан Башлығы республика Хөкүмәтенә халыҡ араһында киң аңлатыу кампанияһын ойошторорға ҡушты.

– Мәғлүмәтте халыҡҡа еткерергә кәрәк, улар аңлаһын һәм хеҙмәттәр менән уңайлы файҙалана алһын өсөн, – тип йомғаҡ яһаны Радий Хәбиров.

https://glavarb.ru/ba/news/event/bashortostanda-2026-yyldan-balaly-aillrg-yaram-buyynsa-yay-saralar-mld/