Республика көрәшселәре Ҡазанда алтын миҙалдар яуланы

Башҡортостан көрәшселәре Ҡазанда билбау көрәше буйынса донъя чемпионатында һәм беренселегендә тәүге миҙалдар яуланы. Яҡташтарыбыҙҙың еңеүе тураһында республика хөкүмәте вице-премьеры — спорт министры Руслан Хәбибов хәбәр итте.

«Туғандаш Татарстандан яҡшы хәбәрҙәр килде. Беҙҙең егеттәр Ҡазанда билбау көрәше буйынса донъя чемпионатында һәм беренселегендә тәүге миҙалдар яуланы», — тип яҙҙы ул үҙенең telegram-каналында.

Малик Емилов һәм Әнүәр Әхмәтғәлиев алтын миҙалдар алды. Улар 60 һәм 65 килограмм ауырлыҡ категорияларында еңеүсе булды. Шулай уҡ Рәсәйҙең йыйылма командаһы составында Рәмзил Кинйәбулатов (55 килограмм) бронза яуланы.

Башинформ.