Матур ҙа, уңайлы ла буласаҡ

Башҡортостандың бөтә ҡалалары ла йәшәү өсөн уңайлы тип танылды. Шул иҫәптән Стәрлетамаҡ ҡалаһы ла. 2024 йыл йомғаҡтары буйынса Ҡала мөхитенең сифат индексын Рәсәйҙең төҙөлөш һәм торлаҡ-коммуналь хужалыҡ министрлығы иғлан итте.

Был индексты белгестәр 1 116 ҡала буйынса 36 параметрға нигеҙләнеп иҫәпләп сығарған. Былар – төҙөкләндереү, хәүефһеҙле, йәмәғәт транспорты, юлдар, ҡулай мөхит һәм башҡалар. Уңайлы мөхитле ҡалалар арта ғына барҙы. Әгәр 2018 йылда улар ни бары алтау булһа, 2023 йыл һөҙөмтәләре буйынса – 17, ә хәҙер был рейтингҡа тәүге тапҡыр 21 ҡала ингән.

“Маҡсатыбыҙға ирештек тә, ял итһәк тә була тигәнде аңлатмай. Беҙ республика ҡалаларын һәм ауылдарын төҙөкләндереү өлөшөндә күп нимәгә өлгәштек, һәр ҡала-райондарҙа кешеләр рәхәтләнеп ял итә алһын өсөн матур парктар, ял урындары барлыҡҡа килде. Алда ла шаҡтай ҙур эштәр көтә әле”, – тине был хаҡта Башҡортостан Башлығы Радий Хәбиров.

2025 йылда ғына “Йәшәү өсөн инфраструктура” милли проектының “Уңайлы ҡала мөхитен булдырыу” программаһы буйынса 164 йәмәғәт урындарын тәртипкә килетереү планлаштырылған, уларҙың 94е – федераль бюджет ярҙамы менән. Эштәр башланған да инде.