Быйыл республикала 43 спорт залы ремонтланасаҡ

Быйыл республика мәктәптәрендә 43 спорт залы ремонтланасаҡ. 22 объектта эштәр тамамланған, ҡалғандары яңы уҡыу йылына тиклем әҙер буласаҡ. Былтыр ҙа ҡырҡ өс спорт залы яңыртылған. Был хаҡта үҙенең социаль селтәрҙәрҙәге сәхифәләрендә республика Башлығы Радий Хәбиров хәбәр итте. 

«Тормоштағы күп ҡаҙаныштарым өсөн спортҡа бурыслымын. Хәҙер Бөтә Башҡортостан буйынса балалар спорт менән шөғөлләнһен һәм шуға ынтылышы булһын өсөн кәрәкле шарттар булдырыу иң мөһим бурыстарыбыҙҙың береһе тип иҫәпләйем. Ҙур ҡалаламы йә бәләкәй ауылдамы —  уларҙың ҡайҙа йәшәүе мөһим түгел. 

Төбәктә «Мәғариф» милли проектының «Һәр баланың уңышы» федераль проекты тормошҡа ашырыла. 2019 йылдан беҙ мәктәп спорт залдарын, майҙансыҡтарын ремонтлайбыҙ, инвентарҙәр һәм ҡорамалдар менән йыһазландырабыҙ, мәктәп спорт клубтарын үҫтерәбеҙ. Ошо маҡсатта федераль бюджеттан ҙур аҡсалар йәлеп итәбеҙ, беҙҙең бюджеттан да финанслау ҡаралған. Маҡсат — 2024 йылға тиклем проектҡа республика буйынса 288 мәктәпте һәм 33 мең баланы йәлеп итеү»,- тип яҙҙы Башҡортостан Башлығы. 

https://bash.bashinform.ru/news/social/2023-08-16/byyyl-bash-ortostanda-43-m-kt-p-sport-zaly-remontlanasa-3390740