+20 °С
Болотло
Йәмғиәт
3 Ноябрь 2023, 07:00
Башҡортостан Башлығы республиканың иң яҡшы хеҙмәткәрҙәренә дәүләт наградалары тапшырҙы
4 ноябрь – Халыҡтар берҙәмлеге көнө алдынан республика етәксеһе Радий Хәбиров Өфөлә уҡытыусыларға, ғалимдарға, табиптарға, аграрийҙарға, мәҙәниәт эшмәкәрҙәренә, эшселәргә, инженерҙарға, эшҡыуарҙарға Рәсәйҙең һәм Башҡортостандың дәүләт наградаларын тапшырҙы.
«Бөтә ил менән Халыҡтар берҙәмлеге көнөн билдәләгәндә, илебеҙ халыҡтарының берҙәмлеге, Ватанға тоғролоғо, уны яҡларға әҙерлеге генә еребеҙҙә тыныслыҡ һәм татыулыҡ булдырыу, Рәсәй дәүләтен һаҡлау һәм нығытыуҙың төп шарты булып тороуына тағы ла нығыраҡ инанабыҙ. Беҙ бер ҡасан да ата-бабаларыбыҙ васыят итеп ҡалдырған ҡиммәттәрҙе һәм идеалдарҙы һатмаясаҡбыҙ. Бөгөн Рәсәй һалдаттары, шул иҫәптән яҡташтарыбыҙ илебеҙҙе нацистарҙан һаҡлай. Беҙ Донбасҡа туғандарса ярҙам күрһәтәбеҙ, гуманитар йөк менән 100-ҙән ашыу колонна ебәрҙек. Республикабыҙ табиптары, төҙөүселәре, юл һәм коммуналь хеҙмәт эшселәре Рәсәйҙең яңы төбәктәрендә тыныс тормошто көйләүҙә ҡатнаша. Башҡортостан да хәҙер ҙур төҙөлөш майҙанын хәтерләтә. Торлаҡ, мәктәптәр, балалар баҡсалары, дауаханалар һәм спорт үҙәктәрен төҙөү йылдам темптар менән бара. Баш ҡалабыҙҙың 450 йыллыҡ юбилейына күләмле эштәр алып барыла. Өфө – Хеҙмәт ҡаһарманлығы һәм даны ҡалаһы, Рәсәй дәүләте үҙәктәренең береһе. Ошо мөһим ваҡиғаға етди әҙерләнәбеҙ. Республика яҡташтарыбыҙҙың хәрби һәм хеҙмәт батырлыҡтары, уларҙың Ватанға фиҙакәр хеҙмәте менән ғорурлана. Беҙ балаларҙы патриоттар итеп үҫтерәбеҙ. Һеҙҙең һәр берегеҙ – улар өсөн иң яҡшы өлгө», - тип билдәләне Радий Хәбиров һәм ҡайһы бер бүләкләнеүселәр тураһында айырым әйтеп китте.
Бөгөн Учалы тау-байыҡтырыу комбинаты директоры Зәкәриә Ғибәҙуллин Халыҡтар дуҫлығы орденына лайыҡ булды. Уның етәкселегендә комбинат йыл һайын мәғдән сығарыу һәм эшкәртеү буйынса планды арттырып үтәй, дауаханалар төҙөүҙә ҡатнаша, спорт һәм мәҙәни проекттарға спонсор ярҙамы күрһәтә, мәктәптәргә һәм балалар баҡсаларына шефлыҡ итә. Һуңғы ике йылда ғына хәйриә ярҙамы 300 миллион һум тәшил иткән.
Республиканың халыҡ артисы, Рәсәйҙең атҡаҙанған артисы Рәүис Заһитов ярты быуатҡа яҡын ғүмерен Мәжит Ғафури исемендәге Башҡорт академия драма театрына бағышланы. Тамашасыларға бигерәк тә уның комедия персонаждары яҡын. Актер Салауат Юлаев ордены менән бүләкләнде.
«Һәр берегеҙ тураһында йылы һүҙҙәр әйтке килә. Намыҫлы хеҙмәтегеҙ, һөнәри оҫталығығыҙ өсөн рәхмәт. Үҙегеҙгә һәм яҡындарығыҙға һаулыҡ, бәхет, именлек, оптимизм теләйем», - тине Башҡортостан Башлығы.
