+20 °С
Болотло
Йәмғиәт
27 Ноябрь 2023, 11:58
«Төньяҡ амурҙары» йәнһүрәте Белоруссиянан награда менән ҡайтты
Минскиҙа «Лiстапад» халыҡ-ара кино фестивале тамамланды. Был ваҡиға бик күп илдәрҙең кинематографистарын берләштерә. «Лiстападзiк» программаһына 36 илдең 15 анимация фильмы һайлап алынған.
«Төньяҡ амурҙары» йәнһүрәте Белоруссиянан награда менән ҡайтты
«Лiстападзiк» конкурс программаһы балалар һәм анимация фильмдары өсөн бүленгән. Быйыл Абдразаҡов исемендәге «Башҡортостан» киностудияһы унда «Төньяҡ амурҙары» йәнһүрәтен (режиссеры Руслан Тәүәбилев) күрһәтте. Йәнһүрәт жюриҙың махсус призына лайыҡ булды, тип хәбәр иттеләр «Башинформ» агентлығына Мәҙәниәт министрлығының матбуғат хеҙмәтенән.
Хәтерегеҙгә төшөрәбеҙ, «Төньяҡ амурҙары» — Башҡортостандың федераль прокат алған беренсе тулы метражлы йәнһүрәте. Был эш Башҡортостан Республикаһы Башлығы Радий Хәбиров булышлығында бойомға ашырылды. Батыр башҡорт яугирҙәре тураһында йәнһүрәт геройҙары Башҡортостандың мәҙәниәт министры Әминә Шафиҡова, опера йондоҙо Асҡар Абдразаҡов, йырсылар Айҙар Ғәлимов, Радик Юлъяҡшин (Elvin Grey), Нәзифә Ҡадирова, Via Chappa төркөмө лидеры Илья Тавлияров, спорт комментаторы Азамат Моратовтың тауышы менән һөйләй.
29 ғинуарҙа Мәскәүҙең Кино йортонда тулы метражлы анимация фильмы күрһәтелде. Май айында картинаны Өфө тамашасылары ла ҡарай алды. «Башинформ» Башҡортостан Башлығы Радий Хәбировтың республикала йәшәүселәрҙе «Төньяҡ амурҙары»н ҡарарға саҡырыуы тураһында хәбәр иткәйне.
