Үҙ тупһама аяҡ баҫҡас бәхетемдең сиге булманы

Миңә өс йәш тирәһе булғанда әнейем ауыл осонда өй һалып сыҡҡан. Тыуған ауылында теге, йорттан был йортта фатирҙа йәшәп ,үҙ тупһама аяҡ баҫҡас бәхетемдең сиге булманы тип хәтерләгәндәре иҫтә . Мин сабыйҙы әллә күпме әбей ҡараған . Теүәл 4 ай тулғанда әсәйем эшкә сыҡҡан. Төпкөл ауылда йәсле тигән нәмә юҡ .

Ул инәйҙәрҙе мин хәтерләмәйем. Ә бына иҫ керә башлаған сағымда мине ҡараған Разифа инәйем менән Ғәни бабайымдарҙағы осором иҫемдә .Миңә ни бары 3 йәш.

Әнейем иртән мәктәпкә китер алдынан , мине бер өй аша йәшәгән Разифа инәйемдәргә ҡалдырыр ине . Оҙон урындыҡ өҫтөндә ултырып ҡалғаным асыҡ иҫемдә . Әней ишектән сығыу менән тәҙрә тупһаһына ашығамын , быяла аша уны ҡулымды болғап оҙатып ҡалам . Инәйемдәрҙең ғаиләһе ҙур 9 ул ике ҡыҙ , күңелдәре киң кешеләрҙә миндә үҙ балалары кеүек инем . Оҙон урындыҡ өҫтөндә бергә ултырып ашаған саҡтар иҫтә . Тәгәрмәс бәрәңге әрсеп биргәндәре , самауырҙың гөжләп ҡайнап торғаны ,тирләп бешеп һөтлө сәй эсеп ултырғандар хәтерҙә уйылып ҡалған. Әнейемдең килеп алырын тәҙрә тупһаһында әйберҙәремде йыйып көтөп ултырыр инем. Разифа инәй ашҡа , ҡул эштәренә оҫта булды, бабай ҡура тултырып мал аҫыраны, бал ҡорттары ҡараны. Уларҙың байрам табындарында беҙгә лә урын табылыр ине. Үҫә төшкәс тә уларҙан юл өҙөлмәне . Ғәни бабай умартаһынан бал айырыу менән бар урам баларын һыйлар ине .Бер заман бабай тауҙан айыу аулап алып ҡайтты . Ат арбаһында ятҡан айыу тиреһен күрергә бар күрше тирә - яҡ йыйылды.Малдарға һәм кешеләргә ташланған айыуҙы бабайыбыҙ атып алған. Һуңынан ҙур ҡаҙанда айыу итен бешереп күршеләрҙе һыйланы .

Кешелекле ихлас кешеләр ине Әхмәтйәнова Разифа инәй менән Әхмәтйәнов Ғәни бабай .

Улар тәрбиәләгән балалар беҙҙең төбәктең ғорурлығы , Башҡортостандың халыҡ артисы Әхмәтйәнов Фәһим ( фажиғәле һәләк булды) , Башҡортостандың атҡаҙанған уҡытыусыһы Зәйтүнә апай .
Ауыл зыяратында инәйем менән бабайым йәнәшәһендә әнейем ята . Урындары ожмахта булһын яҡындарымдың .