«Малайҙың исемен хурлауҙан туҡтағыҙ!»

Хәтерегеҙгә төшөрәбеҙ, 12 йәшлек уҡыусы Родион Хеҙмәт Геройҙары бульвары Менән Башҡорт Кавдивизияһы урамы сатында Infiniti автомобиленә бәрелеп юл фажиғәһендә һәләк булды. Киң мәғлүмәт сараларында ҡеүәтле мотоциклды үҫмергә тыуған көнөнә атаһы бүләк иткән тигән хәбәрҙәр барлыҡҡа килде. Социаль селтәрҙәге комментаторҙар фажиғә урынында ғаилә башлығы тап шуның өсөн улынан ғәфү үтенгән тип фаразлай, резонанслы видеола ул улының кәүҙәһе янында тубыҡланып тора.

Атаһы был имеш-мимештәрҙе кире ҡаға. Уның һүҙҙәренсә, Родион үҙе беренсе питбайкка ғаилә умарталығында ярҙам итеп аҡса эшләй. Ата-әсәһе уға ихатанан ситтә йөрөүҙе ҡәтғи тыйған. Шул көндө малай бал һатып үҙенә икенсе питбайк һатып алған. Үҫмер, өлкәндәрҙән рөхсәт алмай, шатлығы менән уртаҡлашырға теләп дуҫтарына Димгә сығып китә.

Асыҡланыуынса, сит ил машинаһы руле артында 30 йәшлек өс бала әсәһе була. Уның рөхсәт ителгән тиҙлеге сәғәтенә 40 км-ҙан ашыу булған - бәрелештән һуң машинаның тормоз юлы 37 метр тәшкил иткән. Юл-транспорт ваҡиғаһынан һуң водитель хатта машинанан да сыҡмай ултыра, сөнки көслө шокта була.

«Малайҙың исемен хурлауҙан туҡтағыҙ! Родион бер ҡасан да иркәләнгән бала булманы, киреһенсә, эшһөйәр, һәләтле бала булды һәм бик яҡшы уҡыны. Улыбыҙҙың үҙе аҡса эшләргә өйрәнеүе тураһында беҙҙең килешеү бар ине, - тип хәтерләй Родиондың атаһы.  - Шуға күрә ул минең менән бергә умарталыҡ менән шөғөлләнде. 500 бал ҡорто ғаиләһенә тиклем киңәйеү улымдың хыялы булды. Авария ваҡытында бала алғы быялаға бәрелеп осоп китә, капотты иҙә. Машинала тәгәрмәстәрҙең, тәндең эҙҙәре, ә видеола баланың юғары һәм алыҫҡа осоп барып төшөүе күренә. Улымдың сәғәтенә 100 км тиҙлектә барған автомобилде күреп туҡтап өлгөрөү мөмкинлеге бөтөнләй булмай! Ул мотошлемда була, әммә был уның ғүмерен ҡотҡара алманы, - тип һөйләне һәләк булған малайҙың атаһы Руслан.

Малайҙың атаһы әйтеүенсә, Родион шунда уҡ, ғазапһыҙ һәләк була. Тәнендә ҡан эҙҙәре лә юҡ тиерлек.

28 августа Родионды тыуған ауылы Йоматауҙа ерләгәндәр. Һуңғы юлға оҙатырға уның яҡындары һәм дуҫтары, класташтары һәм уҡытыусылары, шулай уҡ ауылдың күп кенә битараф булмаған кешеләре килгән. Ата-әсә уларҙың ғаиләһен хөкөм итмәҫкә, ә балалар менән хәүеф тураһында һөйләшеүҙең мөһимлеге тураһында һығымталар яһарға саҡыра.

Гүзәл РӘМИЕВА

Фото асыҡ сығанаҡтарҙан

Мәғлүмәт