Сит ил студенттары өсөн беҙҙең уҡыу йорттарында шарттар бармы?

– Лилиә Бакир ҡыҙы бөгөнгө көнгә юғары уҡыу йортонда сит ил студенттарын уҡытыу мәсьәләһе көнүҙәкме?

– Рәсәй Федерацияһы Президенты Владимир Владимирович Путин Указына ярашлы, 2030 йылға Рәсәй вуздарында сит ил студенттары һаны 500 меңдән кәм булмаҫҡа тейеш. Был “2030 йылға тиклемге осорға һәм 2036 йылға тиклемге перспективаға Рәсәй Федерацияһын үҫтереүҙең милли маҡсаттары тураһында”ғы указда ҡаралған.

Сит ил студенттарын университетта уҡырға йәлеп итеү әлеге ваҡытта юғары уҡыу йорттары эшмәкәрлегенең мөһим йүнәлештәренең береһе булып тора. Өфө фән һәм технологиялар университетының Стәрлетамаҡ филиалында халыҡ-ара белем биреү процесына иғтибар бирелә.

Был мөһим геосәйәси ресурс булараҡ ҡарала, ул мәҙәни ҡиммәттәрҙе таратыуға һәм алға ебәреүгә, шулай уҡ төбәктең дә, тотош илдең дә иҡтисади йәлеп итеүсәнлеген арттырыуға булышлыҡ итә. Был алым ҡиммәт ориентирҙарын формалаштырырға ярҙам итә һәм сығарылыш уҡыусылары ҡайтҡан дәүләттәр менән дуҫтарса мөнәсәбәттәр булдырыуға булышлыҡ итә. Былар барыһы ла мәғариф өлкәһендә халыҡ-ара хеҙмәттәшлектең әһәмиәтен һыҙыҡ өҫтөнә ала.

– Һеҙҙең уҡыу йортонда яҡынса нисә сит ил студенттары уҡый?

– Әлеге ваҡытта донъяла юғары уҡыу йорттарында белем алыусыларҙың яҡынса ике проценты – сит ил студенттары. Университеттың Стәрлетамаҡ филиалында уҡыған сит ил студенттары нисбәте 6 проценттан ашыу тәшкил итә (9692 студентҡа 590 сит ил студенты тура килә). Педагогика һәм психология факультеты стеналарында түбәндәге илдәрҙән студенттар белем ала: Әзербайжан, Ҡаҙағстан, Ҡырғыҙстан, Тажиҡстан, Төркмәнстан, Үзбәкстан һ.б. Педагогика һәм психология факультетында 234 сит ил студенты уҡый. Студенттар көндөҙгө һәм ситтән тороп уҡыу формаһын һайлай.

– Сит ил студенттары менән эшләүҙә ниндәй пландарығыҙ бар?

– Өфө фән һәм технологиялар университеты Стәрлетамаҡ филиалының педагогика һәм психология факультеты коллективы тарафынан рус телен өйрәнеү һәм сит ил студенттарын яраҡлаштырыу өсөн “Рус телмәре мәктәбе” махсуслаштырылған ресурс үҙәге булдырылды һәм тормошҡа ашырыуға әҙер. Проект әҙерләнгән һәм Башҡортостан Республикаһы Башлығы грантына ғариза ебәрелгән. Был саралар сит ил студенттарының уҡыуға уңышлы социаль-мәғариф йәһәтенән яраҡлашыуына булышлыҡ итә. Уңышлы яраҡлашыу тормоштан ҡәнәғәтлек кимәлен арттыра һәм ҡуйылған маҡсаттарға өлгәшеүгә булышлыҡ итә ала, – тип тамамланы һүҙен Лилиә
Бакир ҡыҙы.

Беҙ иһә, үҙ сиратыбыҙҙа, Рәсәйҙә белем алып, студенттар тыуған илдәренә ҡайтҡас та, илебеҙҙең дуҫы булып ҡалыуын, ә беҙҙең юғары уҡыу йортон тамамлау тураһындағы дипломға шулай уҡ белем, яңы бәйләнештәр һәм ыңғай тәьҫораттар өҫтәлеүен теләйбеҙ.

Фотолар Өфө фән һәм технологиялар университеты Стәрлетамаҡ филиалы сығанаҡтарынан.