Башҡортостан Петербург халыҡ-ара иҡтисади форумында 35 килешеү төҙөнө

Форумда ҡул ҡуйылған төп килешеүҙәр иҫәбендә – «Полиметалл» компанияһы менән капитал һалыуҙарҙы яҡлау һәм дәртләндереү тураһында килешеү. Ул Хәйбулла районында Яңы Петровск ятҡылығын үҙләштереүҙең төп шарттарын нығыта. Бынан тыш, форум сиктәрендә «Росагролизинг» АЙ менән агротехнологик хеҙмәттәрҙе үҫтереү буйынса килешеү һәм «Салауатбыяла» АЙ менән предприятиеның етештереү линияһын модернизациялау тураһында килешеү төҙөлгән.

Вице-премьер шулай уҡ форум майҙансығында Башҡортостан стендының популяр булыуын билдәләне. Республика экспозицияһы менән бер нисә мең ҡунаҡ, шул иҫәптән илдең власть органдары һәм төбәктәре етәкселәре, шулай уҡ үҫеш институттары һәм ҙур компаниялар вәкилдәре танышҡан.

Милли инвестиция рейтингы һөҙөмтәләрен иғлан итеү Петербург халыҡ-ара иҡтисади форумында төп ваҡиғаларҙың береһе булды. Башҡортостан быйыл унда өсөнсө йыл рәттән өсөнсө урын яуланы.

Төбәк етәксеһе делегация вәкилдәренә форумдағы һөҙөмтәле эштәре өсөн рәхмәт белдерҙе.

– Ҡатнашыусыларҙың барыһына ла рәхмәт. Республикаға, беҙҙең стендҡа ҡарата ҡыҙыҡһыныу бик ҙур булды, – тип һыҙыҡ өҫтөнә алды Радий Хәбиров. – Алдыбыҙға ҡуйған төп бурыс Башҡортостан хаҡында, ҡатмарлыҡтарға ҡарамаҫтан, көсөбөҙ етерлек булыуын һәм яҡшы темпта эшләүебеҙ хаҡында һөйләү ине.

https://glavarb.ru/ba/news/event/bashortostan-delegaciyay-peterburg-haly-ara-itisadi-forumy-siktrend-112-milliard-uma-35-kileshe-tn/