+30 °С
Болотло
Спорт
12 Май 2021, 12:30
Европа чемпиондары Родион Алимов менән Алина Дәүләтова Өфөгә ҡайтты!
Улар Киевта тарихта булмаған ҡаҙанышҡа иреште. Аэропортта чемпиондарҙы туғандары, дуҫтары һәм БЮТ каналының ижади төркөмө ҡаршы алды.
Өфө аэропортына башҡорт чемпиондары аяҡ баҫты. Күптән түгел генә бында шашка буйынса ете тапҡыр донъя чемпионы Тамара Танһыҡҡужинаны сәләмләһәләр, бөгөн Европа триумфаторҙары. Родион Алимов менән Алина Дәүләтова еңеүселәр.
Ярыш ҡатмарлы булды, көп көс һалдыҡ. Европаның иң көслө спортсылары йыйылғайны. Үҙ кимәлеңде, оҫталығыңды күрһәтеү зарур ине.
Алина Дәүләтова һәм Родион Алимов, бадминтон буйынса Европа чемпиондары
Родион Алимов менән Алина Дәүләтова алтын миҙал яуланы. Был спортсыларҙың тәүге еңеүе генә түгел. Улар 12 йыл инде бергә сығыш яһай.
Ике йыл элек Һиндостанда турнирҙа еңеү яуланыҡ. Был уйындар күпкә көсөргәнешле булды.
Алина Дәүләтова һәм Родион Алимов, бадминтон буйынса Европа чемпиондары
Родион менән Алина аша башҡорт бадминтонын тотош донъя таный. Аэропортта уларҙы киләсәктә уңышҡа ирешергә теләүсе бик күп йәш спортсылар ҡаршы алды.
Республика йыйылма командаһы баш тренеры Эдгар Щербий уларҙы үҫтереүгә күп көс һалды. Был уның ҡаҙанышы, беҙ федерация исеменән ярҙам ғына итәбеҙ.
Дмитрий Комлев, Башҡортостандың бадминтон федерацияһы рәйесе
9 май – Еңеү көнөндә Татарстанда бадминтон буйынса Рәсәй кубогы үтте. Европала яуланған алтын өҫтөнә һәм үҙебеҙҙәге турнирҙа ҡатнаша алмаһалар ҙа, Алина менән Родион тағы юлға сыҡты. Һәм парлы категорияла алтынға лайыҡ булды.
Улар Олимпия уйындарында ҡатнашыуға дәғүә итеүсе Европа чемпиондары. Был тағы ла бер тапҡыр Өфө менән Республика бадминтон мәктәбе юғары кимәлдә булыуын күрһәтә.
Руслан Хәбибов, Башҡортостандың йәштәр сәйәсәте һәм спорт министры
Артабан башҡорт спортсыларына оҙаҡ ял итергә тура килмәйәсәк. Әле Олимпия уйындарына һайлау этабының иң ҡыҙыу осоро. Родион менән Алинаны ай аҙағында Сингапурҙа уҙасаҡ хәл иткес турнир көтә. Бурыс ябай түгел – донъяның иң лайыҡлы 16 пары иҫәбенә эләгеү.
Рәйлә Күсемханова
